Messi ​មាន​មុខ​របរ​ទាំង​នេះ ​ទើប​មិន​ខ្វល់​​ប្រាក់​ខែ​១​ឆ្នាំ​ជិត​១០០​លាន​ដុល្លារ​នៅ Barca

  • ​Lionel Messi ​ជា​កីឡាករ​ដែល​មាន​ប្រាក់​តម្លៃ​ពលកម្ម​ខ្ពស់​បំផុត​នៅ​លើ​លោក​នេះ ​ដោយ​១​ឆ្នាំ​រូបគេ​ទទួល​បាន​៨០​លាន​ដុល្លារ​ឯ​ណោះ​ពី​ក្រុម FC Barcelona ​។ នេះ​បើ​តាម​កុងត្រា​ថ្មី​របស់​គេ​ដែល​ចុះ​នៅ​ឆ្នាំ​២០១៧​កន្លង​ទៅ។

​បើ​ទោះ​ជា​ទទួល​បាន​ប្រាក់​ក្បែរ​១០០​លាន​ដុល្លារ​ពី​ក្រុម FC Barcelona ​យ៉ាង​នេះ​ក្ដី ប៉ុន្តែ​ខ្សែ​ប្រយុទ្ធ​អាហ្សង់ទីន​រូប​នេះ ​នៅ​តែ​រក្សា​ចិត្ត​ចង់​ចាកចេញ​ដដែល​នៅ​រដូវ​កាល​នេះ។ ​ការ​មិន​បារម្ភ​ជាមួយ​ប្រាក់​ក្បែរ​១០០​លាន​ដុល្លារ​នេះ ​ក៏​ព្រោះ​ថា Messi ​នៅ​មាន​ជំនួញ​ជា​ច្រើន​ទៀត​ក្នុង​ដៃ ​ក៏​ដូចជា​ក្រុមហ៊ុន​ធំ​ៗ​ជា​ច្រើន​សុទ្ធ​តែ​បាន​កុងត្រា​លើ​គេ ដើម្បី​ជួយ​ផ្សព្វផ្សាយ។ ​បើ​តាម​ប្រភព​ពី Forbes ​កីឡាករ Messi ​នេះ ​រក​បាន​យ៉ាង​តិច​៣៥​លាន​ដុល្លារ​ពី​ក្រុមហ៊ុន​ជា​ច្រើន​ដូចជា ​Gatorade, Huawei, Mastercard ​និង ​Pepsi ​ជា​ដើម។

​មួយ​វិញ​ទៀត ​កីឡាករ​វ័យ​៣៣​ឆ្នាំ​ខាង​លើ​នេះ ​ក៏​មាន​កុងត្រា​មួយ​ជីវិត​ជាមួយ​ក្រុមហ៊ុន​សម្ភារៈ​កីឡា adidas ​ផង​ដែរ។ ដោយ​១​ឆ្នាំ រូបគេ​នឹង​ទទួល​បាន​ប្រាក់​១២​លាន​ដុល្លារ ​ដោយ​គ្រាន់​តែ​ប្រើប្រាស់​សម្ភារៈ​ក្រុមហ៊ុន​នេះ​។ ក្រៅ​ពី​ធ្វើ​ការងារ​ជាមួយ​ក្រុមហ៊ុន​ឯកជន​នេះ​ហើយ Messi ​ក៏​មាន​មុខ​ជំនួញ​បើក​ផ្ទាល់​ខ្លួន​ផង​ដែរ។ ​បុរស​ស្មោះ​ស្នេហ៍​រូប​នេះ​ បាន​បើក​សណ្ឋាគារ​មួយ​នៅ​ក្រុង​បាសេឡូណា ក្បែរ​មាត់​សមុទ្រ ដែល​មាន​៧០​បន្ទប់។ ​ដោយ​សណ្ឋាគារ​នោះ​មាន​ឈ្មោះ​ថា ​Hotel MiM Sitges។ ​ក្រៅ​ពី​នេះ Messi ​ក៏​បាន​ចូលហ៊ុន​ជាមួយ​ក្រុម​ហ៊ុន​នាឡិកា ​Jacob & Co. ​ផង​ដែរ​កាល​ពី​ឆ្នាំ​មុន ​ដោយ​បង្កើត​ជា Brand ​មួយ​ឈ្មោះ​ថា​ JACOB&MESSI។

ដោយ​ការ​រៀបរាប់​ទាំង​អស់​នេះ ​នៅ​មិន​ទាន់​គិត​បញ្ចូល​ការ​បង្ហោះ​ផ្សាយ​ពាណិជ្ជកម្ម​នានា​ដែល​រូបគេ​បាន​ធ្វើ​នៅ​លើ​បណ្ដាញ​សង្គម Instagram ​នោះ​ទេ។ ​កត្ដា​ប្រាក់​រត់​ចូល​គ្រប់​ច្រក​នេះ​ហើយ ​ទើប​បាន​ជា Messi ​ត្រូវ​បាន​គេ​មើល​ឃើញ​ថា​ត្រឹម​តែ​១​ឆ្នាំ​ទៀត​ប៉ុណ្ណោះ រូបគេ​នឹង​ក្លាយ​ជា​អ្នក​កីឡា​ទី​៤​ហើយ ដែល​មាន​ទ្រព្យ​សម្បត្តិ​ដល់​១​ពាន់​លាន​ដុល្លារ។ ដោយ​៣​នាក់​មុន​នោះ​មាន Tiger Wood , Floyd ​និង Ronaldo ​៕

ប្រភព៖ Businessinsider   អត្ថបទ៖ ប្រុស យុទ្ធ